I første omgang er det snakk om å bygge 12 til 15 hus, og ein startar på toppen av byggefeltet med einebustadar, lenger nede blir det også tomannsbustader og rekkehus.
Det er til saman plass til over hundre bueiningar i Årsetbakkane og på hotelltomta som er planlagt utbygd på Vassenden.
Byggeklausul
Vestlandshus Kjeilen AS har totalentreprisen av Gravdal sin del av utbygginga i Årsetbakkane.
Men det betyr ikkje at kundane må bygge seg eit kataloghus.
– Om folk ønsker å bruke ein spesiell arkitekt, kan dei det. Vi får tilpassa dei fleste ønske, fortel Raymond Kjeilen.
Det var nyleg eit folkemøte på Vassenden, og det var stor interesse for å kjøpe tomter i Årsetbakkane.
Området er sørvendt, sentrumsnært og ligg berre ein kort køyretur unna Førde.
– Mange folk har skrive seg på liste, så vi ventar at dei første tomtene blir selde raskt, og då er vi klare til å setje i gang. Når ei utbygging først kjem i gang, veit vi at ballen ofte rullar av seg sjølv, seier Kjeilen.
Planen er at Årsetbakkane byggefelt i første omgang skal knytast til eksisterande veg, vassleidning og annan infrastruktur, og så skal dette byggast ut meir seinare.
– Vi er avhengig av at kommunen legg til rette for at vi kan kople oss på eksisterande infrastruktur.
Det blir for kostbart å bygge alt nytt i starten. Seinare, når det er bygd ut ein del bustader, skal dette på plass, seier Kidøy Lunde.
Det er venta at det tek rundt tre år før den første delen av utbygginga er ferdig.
I Årsetbakkane er det plass til 80 bueiningar, og saman med hotelltomta er det mogelegheiter for om lag 100 nye bustadar på Vassenden.
– Det er utruleg kjekt at vi får så mykje gode tilbakemeldingar frå folk i bygda.
Det er tydleg eit stort ønske om at det blir nybygging og meir aktivitet på Vassenden, seier Kidøy Lunde.
